ღღ 第二次係母嬰健康院嘅產前檢查 & 聽母乳餵哺講座 ღღ
一早起身就要留小便 ~ 但係都要好講究 ~
第一次嘅唔要, 要空肚飲一大杯水, 之後等個幾兩個鐘都唔可以食嘢 ~
到第二次嘅, 唔要前唔要後, 只係留中間果段 ~ 係母嬰健康院嘅要求, 係唔係好講究呢 ~
2:00pm開始, 我1:45pm已經到咗健康院, 但都已經係第32号 ~
唔通1:00pm就開始派 ? 自行拿2張試紙 (見姑娘時先好用)
又係流水式時間
1. 尿液測試 (蛋白同糖份) 2張試紙+小便, 各自比姑娘睇一睇, 姑娘話冇事就清理好去第二part.
2. 第二part係8号房, 排隊磅重, 量血壓.
3. 之後就去6号房門口排隊, 原來係見姑娘, 姑娘幫我摸下我個子宮係邊, 之後就話已經升咗上來喇 ~
而家個位置係我肚臍對落1″到 ~
噤頭先排我前面果2位, 姑娘都有話比佢知BB個頭仔係邊到 ~
噤我咪問姑娘噤我個BB個頭仔係邊到呀 ~
姑娘話BB而家係你個子宮到游緊水呀 ~
哦 ~
而家用部機聽下BB心跳, 會揸小小gel, 自己預備紙巾清潔 ~
吓 ~ 我冇帶到 ~ (叫我記得下次要自己預備) 哦 ~
一放落去就已經聽到細細聲又好快嘅bell bell聲, 跟住姑娘就問我聽唔聽到BB嘅心跳聲呀 ~
我答咗聽到之後, 突然個bell bell聲變得好大聲 ~
姑娘話BB噤叻識得對返住部機 ~ bell bell bell bell好快嘅心跳聲 ~
姑娘仲即刻幫BB計時數心跳添
檢查完之後, 就係出去等叫名時間 ~
跟住當然係即刻同老公講啦 ~ BB頭先好叻識得對返住部機 ~ 比d好大同好快嘅bell bell bell bell嘅心跳聲比我聽呀
老公話可能BB已為你話聽唔到, 所以比大聲d比你聽
好快就叫我入10b房見姑娘, 有冇d咩唔舒服呀, 胃口好唔好食唔食得落嘢呀 ~
仲話我之前係 48.1kg, 今次係 48.7kg, 有重咗 ~ 食多d嘢啦 ~
有冇咩問題 ? 噤當然有啦 ~ 我想要去上果d產前運動班同呼吸班呀 ~
佢話健康院係冇嘅 ~ 比份單張你入面有寫 ~ 另外比個web你可以上網搵d片段睇下 ~
仲有係要醫生先可以寫封轉介信比你自己去物理治療部約期嘅 ~
噤你出去等叫名見醫生啦 ~ 比埋張到診紙比你 ~
下次返來做產前檢查 ~ 4 Mar 2008
帶埋份Antenatal Record
噤就出去等叫名喇 ~ 講座開始喇 ~ 當然拿拿聲入去聽咗先啦 ~
母乳餵哺講座 ~ 好多人聽 ~
對我來講我覺得好有用, 知多咗好多嘢
原來一入院就要講定比醫生姑娘知你係餵母乳嘅 ~
噤佢哋就會唔用奶瓶餵 ~ 清潔好就會交比我 ~
最好係一生完半個鐘內開始餵第1餐~
一日最少要餵8餐 ~ 通常係10-12餐 (係開頭果2個week, 之後姑娘話BB會慢慢條整)
仲有原來頭3日嘅係最多抗體同營養 (係黃黃地色, 雖然份量唔多, 但會足夠BB食飽, 唔使擔心)
** 話最緊要係放鬆同訓覺 **
如果唔識仲可以帶埋BB返健康院, 所有姑娘都可以教到添 ~
另外原來要餵清一邊, 先再餵另一邊架 ~ 原因係前頭果d糖份比較高, 後面果d就脂肪比較多, 會飽d ~
當BB食飽 (大約30-40mins), 就可以見到BB好滿足嘅樣子, 會睡覺 ~ 姑娘話當BB訓, 我就好訓喇 ~
個幾鐘後就要睇下BB有冇郁郁下, 咀仔郁郁, 有就要餵BB喇 ~ 唔好等佢喊先至餵喎 ~
另外如果想知BB有冇食夠, 就睇尿片 (一日有6次就得架喇)
原來餵母乳係有d嘢係唔食得嘅 ~
e.g. 薑醋, 雞酒, 有草藥嘅嘢, 肝類, 乳鴿, 椰菜, 豆豉 ……
要飲多d水, 奶, 高鈣低糖豆漿 …… 就已經可以喇 ~
如果餵母乳時覺得痛, 千期唔好忍, 姑娘話一定係錯咗先會痛 ~
要用手指尾, 放入BB咀邊, BB就會放開, 等BB將口打開 (好似打喊路噤大), 先再放入 ~
因為BB都係學習中, 所以都要比佢知要噤先食到 ~
聽完個講座就出返去等醫生叫名喇 ~
好快就叫我入13房見醫生, 真係入去見一見, 醫生只係問返我係唔係想要上產前運動班同呼吸班 ~
我答完係, 佢就叫我去返5号房門外得就得 ~ 真係快1min都唔使 ~ 就出返去 ~
又要等喇 ~
終於有喇 ~ 姑娘話拿住張轉介信, 去返Wales嘅物理治療部到做登記 …
有冇其他問題 ? 剛剛諗起頭先個講座話有個用公仔來實習嘅班 ~
噤就問下啦 ~ 姑娘話未出時間喎, 不過可以幫我登記先, 出咗時間就通知我 ~
當然我就好開心啦 ~
拿拿聲趕去下一站 ~